Како што најавив (со мало задоцнување), доаѓа и мојата ретроспектива на минатата 2006 година во фудбалот. Во првиот дел ќе се осврнам на домашниот фудбал.

Репрезентацијата пред натпреварот против Русија

Репрезентацијата на Македонија дефинитивно е она што најмногу ќе го паметам од изминатата година. Фактичката состојба вели дека по 5 натпревари во нашата квалификациска група, се уште имаме реални шанси за висок пласман, а годината ја завршивме со најдобар пласман за нас во историјата на ранг-листата на ФИФА. Ме радува фактот што за првпат по многу години публиката и фановите имаат доверба во националниот тим. Првпат во историјата се скандираше името на селекторот на Градски во Скопје, а во посебно сеќавање ќе ми остане моето патување во Манчестер каде на Олд Трафорд одигравме одличен натпревар против Англија кој долго ќе се памети.
ИН во 2006 -> Среќко Катанец, Горан Пандев, нерешениот резултат против Англија, најдобриот пласман на ранг-листата на ФИФА.
АУТ во 2006 -> ФФМ со високата цена на билетите за натпреварите на репрезентацијата, продавањето на цела северна трибина на фановите од Англија.
Неправда во 2006 -> Несреќниот пораз од Англија во Скопје.

Македонија ЃП - освојувач на Купот на Македонија

Факт е дека Македонската Прва фудбалска лига донесе поголем квалитет од претходните години. Освен Работнички Кометал, на сцената имаме втор клуб кој функционира беспрекорно: Македонија ЃП. Трката за титулата до последните кола и крајот на првата полусезона оваа година со изедначен број на бодови на Македонија и Работнички ветуваат максимално интересен фудбал до крајот на оваа сезона. Финалето од Купот на Македонија беше меѓу најквалитетните натпревари кои било кога се одиграле на Градски, а во Евро-натпреварувањата, Работнички го повтори најголемиот успех во нашата историја - 3-то квалификациско коло во ЛШ.
ИН во 2006 -> Трофеите завршија во раце на клубовите кои работат најпрофесионално и можеби ова ќе биде мотив и за другите да се „оправат“ во иднина.
АУТ во 2006 -> Слабата посетеност на стадионите иако во домашното првенство минатава година имаше многу натпревари кои вредеа да се погледнат. Сите оние кои декларативно се залагаат за подобар мак-фудбал треба од себе да почнат да го направат теренот погоден за поквалитетно првенство и да жртвуваат 2 часа неделно од своето време на некој од стадионите. Со билетот кој ќе го платите ќе му помогнете на својот клуб.
Неправда во 2006 -> Она кое им се случуваше на фудбалерите на Вардар кои имаат статус како вработени во стечајно претпријатие, а не како фудбелери на најтрофејниот клуб во една земја.

---

Tags: football, Macedonia, фудбал, Македонија, euro2008, Katanec, Катанец, Rabotnicki, Vardar, Makedonija, FFM.